La Pro Grigioni Italiano
paragraf - La Pro Grigioni Italiano
La Pro Grigioni Italiano (Pgi) è in’uniun fundada a Cuira l’onn 1918 per promover la lingua taliana sin il plaun chantunal e federal, per sustegnair l’identitad culturala dal Grischun talian e per defender ils interess da la minoritad italofona.
La Pgi ha ina structura federativa cun in cussegl directiv ed ina sedia centrala a Cuira. Da l’uniun fan part diesch secziuns. Quatter da quellas èn da chasa ordaifer il chantun Grischun. Las secziuns Bregaglia, Cuira, Engiadina, Moesano e Valposchiavo mainan in center regiunal cun ina persuna incumbensada per fatgs culturals.
Las activitads da la Pgi vegnan finanziadas principalmain da la Confederaziun e dal chantun Grischun sin basa d’ina cunvegna da prestaziun che vala mintgamai quatter onns e che reguarda trais secturs:
- l’organisaziun dad eveniments culturals e d’occurrenzas publicas, p. ex. preschentaziuns da cudeschs, referats, concerts, exposiziuns, curs da lingua;
- la tgira d’ina atgna purschida editoriala che cumpiglia la publicaziun da l’Almanacco del Grigioni Italiano, dals Quaderni grigionitaliani (quatter giadas l’onn), la retscha litterara Pro Grigioni Italiano, la retscha Ricerche, la revista per uffants Mondo Nostro ed autras ovras spezialas;
- la cuntinuitad d’in presidi permanent che ha influenza sin decisiuns politicas e sin tut ils temas che pertutgan ils dretgs linguistics per garantir a la lingua taliana sia rolla duida en differents secturs e sin differents nivels. Per ademplir sia incumbensa e pudair correspunder als basegns promova la Pgi retschertgas specificas, publitgescha posiziuns e tgira las relaziuns cun las instituziuns sin il plaun chantunal e federal e cun il Cussegl d’Europa.
Las activitads da l’uniun vegnan exequidas da persunal qualifitgà, ma ella vegn era sustegnida da numerus voluntaris tant sin il nivel strategic (cussegl directiv, comités da las secziuns e cumissiuns) sco era quai che reguarda ils fatgs operativs.
Salid dal President
Chara visitadra e char visitader,
jau hai grond plaschair da beneventar Vus sin nossa pagina-web che porscha cuntegns interessants, captivants e surpendents davart la Pro Grigioni Italiano.
Cun questa fanestra As vulain nus offrir infurmaziuns d'interess general davart las activitads principalas e novitads en connex cun nossa uniun. Occurrenzas, communicaziuns a las medias, reglaments, publicaziuns ed archivalias, ma era videos, fotos e medias socialas: la Pgi raquinta sur da sasezza per parter sias ideas, ses projects, sias retschertgas e sias valurs.
La communicaziun virtuala è sulettamain ina vitrina per mussar tge che nus faschain. Nus savain che nossa raschun dad esser sa mussa principalmain en acziuns concretas e ch'ella vegn mesirada tenor numerus criteris sco l’effizienza da nossa lavur, la qualitad da noss servetschs e nossa preschientscha en las regiuns e las instituziuns. Nus vulain che questa pagina-web possia intermediar tut quai en la structura ed ils cuntegns.
La pagina-web vul però era dar ina vusch a las bleras cuminanzas che ans suondan e promover la discussiun publica che metta en il center nossa lingua e cultura e noss dretgs sco era nossas obligaziuns sco Grischunas e Grischuns da lingua taliana. Nus As envidain d'ans communitgar libramain ideas, propostas e cussegls.
Jau speresch che questa pagina-web saja nuncumplitgada, actuala e cumpletta. En il num dal persunal, dal cussegl directiv e da la sedia principala As giavisch jau ina buna navigaziun cun la speranza che Vossas propostas possian gidar nus a meglierar la purschida.
